早幾日阿史就介紹到首任臺灣巡撫劉銘傳，亦都有講到佢建設咗當時中國第一條海底電纜，喺1887年由台灣淡水至福州川石成功鋪設，係中國近代電報信息事業嘅一大貢獻。之但係，呢條咁重要嘅海底電纜原來後來嘅結果都好慘下！

當時為咗鋪設呢條電纜，劉銘傳就專門喺英國買咗一艘「飛捷」號炮艦作為水線船，再加上其他成本就足足用咗22萬銀元。呢條海底電纜喺1887年10月11日對外營業，令到當時朝廷可以通過咁而對臺灣作出唔少命令，一改現狀。之但係去到1894年中日甲午戰爭爆發後，1895年根據《馬關條約》中國就被迫將台灣割讓畀日本，呢條咁重要嘅海底電纜亦都喺呢個時候賣埋畀日子，據指劉銘傳聽到呢個消息後，悲憤異常吐血不止，最後仲喺1896年病逝。

咁都仲未完，其實中國同英國、丹麥簽訂咗電信條約，呢條海底電纜係屬於英國大東公司喺中國嘅業務，本應就喺1930年可以歸還中國。只係去到1930年，南京政府就被迫同日本將電電信條約續約14年。呢個舉動令到福建電信職工強烈不滿，最後就喺1931年5月1日喺狂風暴雨之下親手切斷電纜終端，結束咗呢條接近半個世紀歷史嘅淡水至福州海底電纜。

原圖嚟自網絡